ما زلت مصرّاً على رأيي الذي قلته من عشرين عاماً..إذا حلقت لحيتك و شعر رأسك وكنتَ مديوناً فـَ ( يا ويل ويلك من الدّيّانة)..،، وأنا جربتُ هذا الأمر ألف مرّة..ومع ذلك لا أتوب في كل مرّة وأقع في نفس الشَّرَك..،، في الفترة الأخيرة..تركتُ لحيتي تأخذ مجراها..وتركتُ شعر رأسي يستبدّ في الحريّة كما يشاء..وأصوات الناس (إللي حواليّ) تدعوني لأن (أحلق) وأنا أرفض مستعيناً بتجاربي المريرة مع ما بعد (الحلاقة) من بهدلة مع (إللي لهم ديون عليّ)..والكل يقنعني أن (الحال من بعضه) ..وأنا أصرّ على أن عذري قدّام صاحب الدين لمّا أقول: (ما معي إللي أحلق) أفضل بكثير من عذري وأنا (مازط لحيتي ) و (مخفًّف شعر راسي)..،، وأُجبرتُ على الحلاقة ..ليس انصياعاً للناس إللي حواليّ: ولكن حَرّ الطقس جعل شعر رأسي المجعد في حالة (تهييش) دائمة..عداك عن (الحكيكة) الناشطة في رأسي ولحيتي..وعند قوم آخرين يسمون الحكيكة (هَرْشْ)..يعني من قد ما هرشت اضطررتُ للحلاقة تحت ذريعة (يجعل ما حدا حوّش)..،، ومررتُ بالسوق في حالتي الجديدة: بس: كنتُ مسرعاً كي يراني أقل عدد من الناس..،، لو تعلمون عدد النحنحات التي وصلتني من أصحاب الديون: (إحم أحم ..يا ريتو نعيماً..) و(بيّنتْ النعمة بيّنتْ) و(أكيد الجيبة عمرانة) ..هذا غير التلفونات التي لحقتني حتى وصولي للبيت وتدّعي مروري بالسوق مسرعاً و أنا حالق (عسى ما شر) و (متى بدنا نشوفك) أو (ما بدّك تحن علينا) ..،،وانتشر خبر حلاقة لحيتي ورأسي أسرع من خبر انتشار خبر وفاة أي أحد ..،، بالله عليكم ..لو ما حلقت مش أشرفلي ..ولا خلّيت إللي يسوى وإللي ما يسوى يحرجوني هيك إحراجات ما إلها داعي ..قال إيش: بدهم مصاري مني انا..؟ طيب ما الحكومة: الناس بدها منها مصاري كمان..وهي حالقة ومنعمة وما حدا (مسترجي) يطلب منها أو يحكي معها تلفون..؟؟ اشمعنى أنا يعني...؟؟

abo_watan@yahoo.com